Tala at Tula ni Ginoong Cequeña

Naglalakbay ang aking buhay na puno ng pag-asa

Bawat segundo, bawat oras ay sobrang mahalaga

Isang araw may babaeng ipinakilala

Bulong sa isipan.... Sino nga ba siya?

Gabi man o araw nagpapalitan ng diyalogo

Napapangiti sa palitan din ng litrato

Nag-krus ang aming puso buwan ng Pebrero

Di inaasahang marinig matamis niyang "oo"

Anino, paa, likod at buhok niya

Unti-unting ibinahagi sa social media

Mga katoto nagagalak pati kapamilya

Hanggang sa sumapit mukha niya'y nakita

Kanta doon, kain dito... Gala dito, punta doon

Ito ang hilig namin sa unang taon

Puso ay tumatawa sa pangyayaring iyon

Wag na sanang matapos kung may pagkakataon

Nang isang araw aksidente'y naranasan

Bakas ang sugat at dugo sa katawan

Pag-aalaga niya'y di matutumbasan

Taos pusong ko siyang pinasalamatan

Di naiiwasan ang mga tampuhan

Simple, komplikado ang pinagdedebatihan

Ngunit mahinahon na sinusolusyunan

Presensya naming dalawa ang kasagutan

Lungkot na napapawi, lungkot na bumabalik

Mahigpit na yakap maaaring ipalit

Malayo ang distansya kaya nananabik

Isipan at pakiramdam koneksyon na malapit

Dumating ang araw na kami'y dalawang taon 

Sabihin na natin walang perpektong relasyon 

Relasyon na muntikan nang paghiwalayin ng panahon 

Panahon na akala'y mundo ko'y di na makakaahon.

***

Ikatlong taon bumalik ang sigla, bumalik ang saya 

Ang dating karakter ay lubusang nag-iba 

Ipinagpasa-Diyos ang bawat isa 

Pag-iisang dibdib ay inaabangan na.

Maraming natutunan, maraming iniwasan 

Mga bagay na di dapat pinapatulan 

Mabuhay nang simple, ang mga puso'y nakatuon

Pinili ang isa't isa at nagpasalamat sa Panginoon.